طول العمر العسكر عسكر

طول العمر العسكر عسكر بس الناس الناس كانت ناس

ايه الجديد في اللي بيحصل دلوقت؟ الفتنة الطائفية: موجودة من زمان من 30 سنة, بطلنا نقبل الاخر و نقبل الاختلاف و نقبل ان ممكن يكون فيه أكتر من صح دائما مقتنعين ان الصح اجابة واحده و انا بس معايا الاجابة و الباقي غلط, من زمان و انا بسمع ناس تقول الدكتور ده مع انه مسيحي بس شاطر و بشوف شلة في الجامعة كلها مسيحيين و شبه منعزلة عن الباقي.

البلطجة: أي حد معاه سلطة بيسيء استخدامها و بيتشطر علي الضعيف, في مناطق في امبابة, الهرم, بولاق, … مفيهاش بوليس و دائما بتحصل خناقات و ناس بتتعور و ناس بتموت و محدش بيتحاسب, فيه أماكن في اسكندرية بلطجية بيفرضوا اتاوات علي أي عربية تعدي حاجه زي الكارته كده و في عز الظهر, الانتخابات بتحصل فيها مهازل ولا حياة لمن تنادي.

الأزمة الاقتصادية: امتي مكنش الاقتصاد بتاعنا أكتع, امتي مكنش فيه تضخم و عجز في الميزانية, امتي مكنش فيه ارتفاع غير مبرر في الاسعار مع انخفاضها في باقي العالم, أزمة السولار حصلت السنة اللي فاتت و اللي قبلها و سواقين الميكروباصات زودوا الاجرة و نص الشعب عايش تحت خط الفقر.

انعدام الثقافة و الوعي: شعار المرحلة (محدش فاهم حاجه) طلاب المدارس الاميين تقريبا قد الاميين اللي من غير مدارس, متوسط قراءة  المصري صفحة في السنة, اناس بتمشي ورا من يدعي العلم أو الدين عمياني من غير اجتهاد و اختلاف, دائما عايزين حد يفكرلنا و احنا ناخد عالجاهز.

امال ايه اللي حصل؟؟ احنا اتغيرنا شيلنا العماص من عيوننا وحدنا كلمتنا و هدفنا مفرقناش بين مسلم و مسيحي غني و فقير من القاهرة و من الاقاليم, بقينا متابعين كل حاجه علشان نفهم اللي بيحصل, شغلنا مخنا لأول مرة, عرفنا ازاي نختلف من غير مننسي الهدف و من غير منسب لبعض, قامت الثورة و اتخلع مبارك و رجالته اترموا في السجن…

و سرعان ما رجعنا للعوايد القديمة و نسينا اللي حصل في التحرير و كل ميادين مصر و استعجلنا قوي في تقسيم التورتة, فيه اتجاه ان سبب المشاكل اللي بتحصل دلوقت الثورة, لأ, المشاكل طول عمرها موجودة ومش معني ان ثورة حصلت انها هتتحل توماتيكي.

لو مرجعناش زي ما كنا في ال18 يوم متجمعين علي هدف واحد مع اختلاف الاراء يبقي الفاسدين اللي اهدافهم واضحة و متعاونين مع بعض هما اللي هيكسبوا و حظ أوفر في اللثورة القادمة

Advertisement